Valgerður H. Bjarnadóttir - konan á bak við Auð/Auði Valgerðar ehf. og verkefnið Vanadís - rætur okkar, draumar og auður
Ljósmynd: Ólafur Thoroddsen
Sérsvið
Sjálfsstyrking, samskipti og sjálfsþekking; goðsagnir, menningarsaga og femínísk trúarheimspeki; kvenfrelsi og jafnrétti; draumar og draumavinna; sjamanismi
Menntun
Félagsráðgjafi frá Noregi 1980, BA í heildrænum fræðum með áherslu á draumafræði frá CIIS í San Fransiskó 1996, MA í femínískri trúarheimspeki og menningarsögu með áherslu á norræna goðafræði og gyðjutrú frá CIIS 2001.
Styttra nám og námskeið í sálarfræði, leikhúsfræðum, sjamanisma, draumafræðum, tungumálum (enska, norræn tungumál, franska), kennslufræðum, fjölskylduráðgjöf, Jungisma o.fl.
Starfsreynsla
Ráðgjöf einstaklinga og hópa, verkefnisstjórn og stjórnun opinberra stofnana og deilda, rekstur eigin fyrirtækis, kennsla unglinga og fullorðinna, stjórnmál, leiklist, alþjóðasamskipti, félagsstarf, starf með útlendingum á Íslandi, móður- og ömmuhlutverk
Stutt æviágrip
Ég fæddist í þennan heim 24. janúar 1954 á heimili ömmu minnar og afa við Hríseyjargötu á Akureyri. Ólst upp á Akureyri og hef búið þar góðan hluta ævi minnar, með nokkrum hléum þó. Sem barn bjó ég um tíma í Englandi. Eftir stúdentspróf stundaði ég nám í sálarfræði við HÍ í eitt ár og brá mér svo til Frakklands þar sem ég gluggaði í frönsku og leikhúsfræði meðfram ýmsum störfum. Þaðan hélt ég til Noregs. Ég útskrifaðist 1980 sem félagsráðgjafi frá Sosialhögskolen Bærum.
1996 lauk ég BA gráðu í heildrænum fræðum (Integral Studies) frá California Institute of Integral Studies í San Francisco, með áherslu á draumafræði. Síðan stundaði ég MA-nám í femínískri trúarheimspeki (Women’s Spirituality) við sama skóla. Þar lagði ég áherslu á að finna tengsl úr íslenska sagnaarfinum við kvenímyndir og trúarminni frá öðrum menningarheimum. Ég lauk náminu 2001 með ritgerðinni Vanadís, Völva, Valkyrja – Images of the Divine from the Memory of an Islandic Woman. Ritgerðin fjallar um leitina að þráðum fornevrópskrar gyðjumenningar, sem hafa lifað og lifa enn í íslenskri menningu.
Um tíma stundaði ég nám í nútímasjamanisma hjá Lynn V. Andrews, Carlos Castaneda og fleirum í Ameríkunni og bætti síðar við þá þekkingu mína hjá Caitlín Matthews í Englandi, en Caitlín hefur í samstarfi við eiginmann sinn John Matthews sérhæft sig í keltneskum fræðum, þ.á.m. sjamanisma.
Ég starfaði á Fjórðungssjúkrahúsinu á Akureyri að loknu náminu í félagsráðgjöf. Stýrði svo íslenska hluta norræna jafnréttisverkefnisins Brjótum múrana frá 1985-1990. Kenndi eitt ár við Gagnfræðaskóla Akureyrar og var svo fyrsti jafnréttis- og fræðslufulltrúi Akureyrar til 1995. Þá brá ég mér til San Fransiskó í nám og bjó þar í rúm tvö ár. Eftir námið í San Fransiskó stýrði ég Menntasmiðjunni um skeið og síðan Jafnréttisstofu til ársins 2003.
Ég hef haldið tengslum við leikhúsið, sem átti hug minn nær allan á yngri árum. Á síðari árum hef ég þó ekki staðið á sviðinu, en látið mér nægja stjórnarstörf hjá Leikfélagi Akureyrar til 2003 auk þess að njóta listarinnar sem neytandi.
Ég hef um áratuga skeið starfað að málefnum kvenna og jafnrétti kynjanna á ýmsum vettvangi. Í því sambandi hef ég lagt áherslu á að þróa óhefðbundnar aðferðir í fullorðinsfræðslu, með sérstakri áherslu á námsnálgun kvenna og sjálfsstyrkingu. Í samvinnu við vinkonu mína Karólínu Stefánsdóttur var námskeiðið Lífsvefurinn spunnið, ofið og haldið fyrir konur um allt land og víðar. Menntasmiðju kvenna stofnaði ég í starfi mínu sem jafnréttis- og fræðslufulltrúi Akureyrar 1994 og hef þróað áfram ásamt fleiri góðum konum. Ég hef verið virk í kvennahreyfingunni og stjórnmálum, tók m.a. þátt í stofnun Jafnréttishreyfingarinnar á Akureyri, Kvennaframboðsins á Akureyri og Kvennalistans og hef tvívegis setið í bæjarstjórn Akureyrar, fyrst fyrir Kvennaframboðið og síðar fyrir Vinstrihreyfinguna grænt framboð.
Á árinu 2006 stofnaði ég svo fyrirtækið Vanadís sem breyttist 2008 í Auður Valgerðar ehf. Þú getur fræðst nánar um starfsemi Auðar/auðs Valgerðar og verkefnið Vanadís - rætur okkar, draumar og auður, á þessari heimasíðu. 2006 tók ég einnig þátt í að koma á fót tveimur félögum, sem eru nú ríkur hluti lífs míns, Mardöll - félag um menningararf kvenna og Félag sjálfstætt starfandi fræðimanna á Norðurlandi eða AkureyrarAkademían. Í húsnæði Akademíunnar, gamla Húsmæðraskólanum við Þórunnarstræti, er ég með vinnuaðstöðu í góðra félaga hópi. Þar skrifa ég, veiti ráðgjöf, held námskeið o.fl.
Ég er móðir einnar dóttur, Sunnu sem fæddist í þennan heim 24. mars 1983, og amma Úlfs Bjarna, sem fæddist 9.apríl 2006. Ég bý og starfa á Akureyri, en er einnig með "starfsstöðvar víðar um land og heim, og þegar ég mögulega get dvel ég í sælureitnum mínum, Sellandi í Fnjóskadal, þar sem ég stunda skriftir, undirbý námskeið og rækta lífsgarðinn minn.
