Speglar sagnanna - gyðjan í mér og þér
Í lok síðustu aldar kom út bókin Women who Run with the Wolves eftir hina mexíkönsk/ungversku Clarissu Pinkola Estés, sálfræðing og rithöfund. Þar nýtir hún minni úr gömlum ævintýrum og goðsögnum sem eins konar spegla fyrir lífið, leiðarvísa um krákustígana sem við öll þurfum að rata í lífinu. Bókin er ein þeirra sem um skeið var kölluð biblía kvenna, og enn hittast konur um allan heim í leshringjum þar sem þær spegla sig í sögunum, styrkjast og víkka sjálfsmyndina.
Í íslenska sagnaarfinum, bæði sögunum og þjóðsögum, er að finna ótal dæmi um sögur sem hafa öll einkenni þeirra goðsagna og ævintýra sem Estés nýtir. Þær fjalla um örlögin, lífið og tilveruna á þann hátt að sérhver manneskja getur speglað sig í sögunni og nýtt hana sem vegvísi. Prinsessan í hörpunni, Áslaug/Kráka, prinsessan þögla sem hulin var tjöru í 15 ár, en leysti þá hinar óleysanlegu þrautir konungsins, er aðeins eitt dæmið.
