Lífsvefurinn - sjálfsþekkingarnám fyrir konur
Almennt - laugardagur 4.feb.12 00:00 - Lestrar 78
Spor í sandi: Lene Zacheriassen
Lífsvefurinn er námskeið um konur, fyrir konur sem vilja læra að þekkja sjálfar sig betur og ná að vefa hinn margþætta vef lífsins á markvissan hátt í einkalífi og starfi. Grunnurinn í Lífsvefnum er heildarhugsun og hringurinn er nýttur sem grunnform.
Helstu efnisþættir eru: sjálfsþekking, sjálfsmynd og samskipti; saga, hlutverk og staða kvenna; heilsa kvenna og tilfinningar; draumar og goðsagnir; fyrirmyndir og fordómar; rætur, lífstilgangur og framtíðarmöguleikar.
Byggt er á eigin kvenlægri þekkingu og reynslu, auk kenninga og hugmynda annarra kvenna og karla með ólíka menntun og sjónarhorn.
Áhersla er lögð á að kynna þátttakendum skapandi lífssýn og ekki síst nýja sýn á sjálfar sig og tengsl sín við rætur, núverandi umhverfi og framtíð. Í gegnum ýmsa spegla opnast gluggar sem veita skilning á stöðu kvenna og hverrar einstakrar konu og útsýni til nýrra möguleika. Þessi þekking verður að uppistöðu sem þátttakendur nýta til að vefa ný munstur í sinn lífsvef, skapa sér nýja sögu.
